Државните институции од декември ќе вршат меѓународни трансакции во евра преку Единствената област за плаќањa во евра – СЕПА. Народната банка ќе ги врши овие плаќања за државните органи преку НЛБ банка. За ова да стане реалност беше потпишан договор меѓу гувернерот на Народна Банка Трајко Славески и претседателот на Управниот одбор на НЛБ Љубљана Блаж Бродњак. Следниот месец, наместо 14 евра по трансакција, без гаранција за брзина и со дополнителни провизии на странските банки, преку СЕПА истите трансакции ќе чинат 3 евра за електронски налози и 5 евра за хартиени, додека сите приливи во евра преку СЕПА ќе се наплатуваат 3 евра. Од НЛБ банка се задоволни од договорот. Велат од стартот на оваа опција за граѓаните, меѓународните трансакции се зголемиле во обем и вредност.
Банкарите задоволни од порастот на кредитирањето годинава. Велат висината на каматните стапки ќе зависи од одлуките на централните банки и интерните политики на банките, но сметаат дека се ниски во однос на нивото на инфлација. Од НЛБ банка очекуваат годинава да имаат кредитен раст од 8 до 10%.
Од Народна банка велат дека банкарскиот сектор е стабилен. Очекувањата се кредитирањето да расте, но потоа да следи благ пад. Кредитната активност забележала силен раст во првите 9 месеци и според есенските проекции на НБМ ќе изнесува 11,6% до крајот на годинава. Зголемувањето на депозитите, пак, ќе изнесува 9 и пол проценти.
