Градскиот воз кој со години па и децении е сон за скопјани станува реалност.
Една линија за градскиот воз ќе стартува од тука, од Железничката станица во Зелениково. До Центарот на Скопје ќе се стигнува за 25 минути.
На вкупно седум станици градскиот воз од Зелениково до Центар ќе собира патници.
Една од станиците каде ќе запира возот е оваа во Драчево. Ако се качам сега во 10,35 во центарот на градот ќе бидам во максисмум 10,48 минути.
На терен веќе може да се видат работници. Со засилена динамика првенствено се работи на линијата Илинден-Драчево која пак ќе се користи за товарен сообраќај што би требало да придонесе и за економиите на овие општини.
Старите дрвени прагови кои се користат повеќе од пет децении се заменуваат со нови армирано бетонски. Се проверува и квалитетот на шините – тие што се дотраени се земенуваат со нови.
Зелениково преку Драчево, Лисиче, Кисела Вода до Нова железничка станица – за половина година 25 километри со градскиот воз ќе се поминуваат за 25 минути.
На главната железничка станица во Скопје ќе се сретнуваат сите линии од градскиот воз. Веќе следната година се планира да почне да се проектира и да се изведува втората траса од Волково, Ѓорче Петров, преку Скопје Север и да заврши токму тука, а од 2027 година да биде и последниот дел на делницата Миладиновци – Илинден – Скопје.
Граѓаните велат дека луѓето ќе се вратат на патување со воз, но апелираат билетите да бидат усогласени со картите за градските автобуски линии за економичност.
Делници се електрифицирани, што е важно зашто дизел возовите нема да влегуваат во Скопје, што пак ќе влијае за намалување на аерозагадувањето.
