Актуелниот градоначалник на Македонска Каменица и кандидат за втор круг на Локалните избори од коалицијата ВМРО–ДПМНЕ и „Твоја Македонија“, Димчо Атанасовски, најави дека доколку повторно биде избран за градоначалник, ќе започне изградбата на нова општинска административна зграда – еден од, вели, најзначајните инфраструктурни проекти за општината.
Атанасовски истакна дека досегашната реализација на вакви проекти била блокирана поради отпор и кочење од претходниот состав на Советот на општината што според него го одложило развојот на општината.
– Со изградбата на новата зграда ќе се промени изгледот на центарот на градот, ќе се подобрат условите за работа на администрацијата и ќе се воведе дигитализација во работењето, со цел побрзи и поедноставни услуги за граѓаните. Изградбата ќе започне веднаш по изборите и ќе биде завршена во првите две години, изјави Атанасовски.
Тој додаде дека паралелно се планираат реконструкција на Здравствената станица во Македонска Каменица и целосна обнова на Детската градинка „Бамби“, Средното општинско училиште „Миле Јаневски Џингар“ и објектот на Јавното претпријатие „Камена Река“.
– Овие конкретни и подготвени проекти ќе ја променат сликата на Македонска Каменица и ќе овозможат стабилен развој и подобар живот за сите граѓани, нагласи Атанасовски.
