Израел ќе ја изгуби поддршката од САД ако го анектира Западен Брег, предупреди американскиот претседател Доналд Трамп. „Тоа нема да се случи, бидејќи им ветив на арапските држави како дел од преговорите за прекин на огнот во Појасот Газа“, изјави Трамп.
Претходно, американскиот потпретседател Џеј Ди Венс, откако израелскиот парламент усвои два закона насочени кон проширување на израелскиот суверенитет над Западниот Брег, изјави дека Израел нема да го анектира Западниот Брег.
„Ако ова беше политички потег, тогаш тоа е многу глупав политички потег, и јас лично го сфаќам како навреда. Политиката на администрацијата на претседателот Трамп е дека Западниот Брег нема да биде анектиран од Израел. Тоа ќе продолжи да биде нашата политика“, рече Венс.
Во Израел денеска допатува американскиот државен секретар Марко Рубио, при што е предвидено тој да има средба со израелскиот премиер Бенјамин Нетанјаху.
