Скопје се гуши во ѓубре. Контејнерите низ градот се преполни, отпадот се таложи на тротоарите, а миризбата и глетката го прават секојдневието на скопјани сè понеподносливо. Иако граѓаните секојдневно апелираат, комуналните служби не го собираат редовно отпадот. Дел од скопјани причината ја гледаат во политичкиот инат на градоначалничката Данела Арсовска, која има помалку од две недели до истекот на мандатот.
Во меѓувреме, и градоначалничката и директорот на „Комунална хигиена“ молчат, без јасен одговор кога и дали ќе се нормализира ситуацијата. Телефонските линии на претпријатието се постојано зафатени, а од Град Скопје одговорноста ја префрлаат токму на „Комунална хигиена“.
„Надлежност за предметната активност има јавното претпријатие Комунална хигиена. Одлуките ги носат членовите на Управниот и Надзорниот одбор, кои ги избира Советот на Град Скопје“, велат од Град Скопје.
Додека градот и надлежното претпријатие бегаат од своите обврски, граѓаните се борат да поминат по тротоарите борејќи се со расфрлани кеси..
Преполни контејнери расфрлано ѓубре и непријатна миризба. Ваква е состојбата во поглемиот дел низ градот во Скопје. Граѓаните се жалат дека отпадот не се собира со недели, а од надлежните засега нема ниту одговор ниту акција.
И додека институциите си ја префрлаат одговорноста, дел од скопските градоначалници, како Орце Ѓорѓиевски и Горан Герасимовски, самостојно се организираа и почнаа со чистењето со општинските екипи и камиони.
