Македонија останува посветена на зелената транзиција и усогласувањето со Европскиот зелен договор. Заменик министерката за животна средина и просторно планирање, Ане Лашкоска, учествуваше на Вториот годишен министерски состанок за Зелената агенда за Западен Балкан, кој се одржа од 14 до 15 октомври 2025 година во Дубровник, во Хрватска.
На состанокот беше усвоена Декларација со која се зајакнува регионалната координација и се отвораат нови можности за финансирање и инвестиции во одржлив развој и зелена економија во регионот. Посебен акцент беше ставен на финансирањето и инвестициските можности за забрзување на зелената транзиција и одржливиот развој во регионот.
Лашкоска, истакна дека зелената трансформација не е само политичка обврска, туку реален процес што директно го подобрува квалитетот на животот на граѓаните.
„Нашата држава останува посветена на создавање одржлива и чиста животна средина. Работиме преку конкретни политики, регионална соработка и активно вклучување на граѓаните, со цел забрзан, но одржлив развој и заштита на природата за идните генерации“, рече Лашкоска.
Таа додаде дека државата вложува во чист воздух, заштита на реките и шумите, управување со отпадот и едукација на младите – како клучни области за подобрување на животната средина.
Настанот во Дубровник овозможи размена на искуства и стратегии за справување со климатските промени и пластичниот отпад, а земјите од регионот ја потврдија својата посветеност кон заедничко делување за зелена и одржлива иднина.
Министерството за животна средина најави дека ќе продолжи со примена на зелени политики и мерки за климатска отпорност, со цел почиста, поздрава и поодржлива средина за сите граѓани.
Настанот овозможи размена на искуства и стратегии за справување со климатските промени и пластичниот отпад, а беше потврдена и регионалната посветеност за заедничко делување кон зелена и одржлива иднина.
