Иднината на државата се создава во училиштата и затоа од исклучителна важност е сите деца да имаат пристојни услови за едукација, а нивните наставници да бидат мотивирани и да имаат можности добро да ја извршуваат својата благородна мисија.
Како Влада се посветивме на инфраструктурата во образованието и во изминатите 16 месеци и вложивме 67 милиони евра – 32 преку Министерството за образование и наука (МОН) и 35 преку повикот на Владата за распределба на средства кон општините за образовни проекти.
Ова го истакна денеска министерката за образование и наука Весна Јаневска која заедно со градоначалникот на општина Гази Баба, Бобан Стефковски, изврши увид во изградбата на спортската сала во рамки на ОУ „Наум Охридски“ во Црешево.
Како што информираат од МОН, Јаневска во своето обраќање истакнала дека инвестицијата во спортската сала е резултат на добрата соработка помеѓу Владата и општината и дека објектот ќе овозможи квалитетна реализација на наставата по физичко образование, но и ќе поттикне поголема физичка активност на децата по завршувањето на часовите.
– Инвестицијата во спортската сала е токму резултат на добрата соработка помеѓу Владата и општината. Објектот ќе овозможи квалитетна реализација на наставата по физичко образование, но и ќе поттикне поголема физичка активност и спортување на децата по завршувањето на часовите, рече Јаневска потенцирајќи дека квалитетната спортска инфраструктура придонесува за градење здрави генерации со вистински вредности – со натпреварувачки дух, упорност, тимска работа, емпатија и меѓусебна почит.
Министерката нагласила дека ќе продолжат инвестициите во образованието со зголемен буџет. Во текот на мандатот Владата, нагласила Јаневска, ќе изгради уште 30 училишни спортски сали и ќе реконструира 15 постоечки во различни општини.
Градоначалникот на Општина Гази Баба, Стефковски, посочил дека по 61 година учениците од Црешево, Виниче и Смилковци кои своето основно образование го поминуваат во ОУ „Наум Охридски“ ќе добијат училишна сала согласно сите европски стандарди.
Тој изразил задоволство од поддршката која ја добива од Владата за модернизација на инфраструктурата во општината, информирајќи дека средствата за објектот во висина од 34 милиони денари се обезбедени преку владиниот повик за распределба на средства по општини за инфраструктурни проекти. Спортската сала се очекува да биде завршена во втората половина на 2026 година.
