ВМРО-ДПМНЕ со убедлива предност пред другите политички ривали. Седум наспрема еден во однос на СДСМ, на точно еден месец пред локалните избори, покажуваат резултатите на анектата спроведена од ИПИС, за потребите на МРТ.
На прашањето која партија сметате дека ќе победи на претстојните локални избори, 42,6 проценти од испитаниците одговориле дека тоа партијата на Христијан Мицкоски, 25,3 велат дека не знаат или воопшто не се определени. Дека ќе победи СДСМ одговориле само 7,9 отсто, а 7,8 дека тоа ќе биде Левица. Во победа на незавнисните листи веруваат 3,8 проценти, додека 3,7 во ЗНАМ.
На прашањето која политички опција најдобро би се справила со проблемите во општините, 40,1 отсто сметаат дека тоа е ВМРО-ДПМНЕ, 22,1 проценти не знаат или немаат одоговор, девет проценти велат дека тоа ќе биде Левица, 8,4 СДСМ, додека пак пет отсто не сакале да кажат, а исто толку одговориле дека ќе гласаат за незисна листа.
На прашање за кој од кандидатите за градоначалник на Скопје ќе го дадат својот глас, 29 проценти се изјасниле за Орце Ѓоргиевски, за Каја Шукова од СДСМ 8,1, за Амар Мециновиќ од Левица 7,3, за Башким Бакиу и Горан Марковски се изјасниле 5,9 проценти, додека за ниту еден од наведените кандидати 8.1. Дека не знаат или се неопределени одговориле 29,6 отсто.
Според мерењата на ИПИС голема предност од 4 наспрема 1 има и кандидатката на ВМРО-ДПМНЕ во Кисела Вода, Бети Стаменковска Трајкоска. Таа има доверба од 39,2 проценти, втор е Јане Ацевски од Левица со 10,5, додека трет е Горан Трајковски од СДСМ со 10,2 отсто.
Анкетата е спроведена телефонски во месец септември, учествувале 1017 испитаници, со маргина на грешка од плус минус 3 проценти.
Матеја Петровски
