Рез на 40 % од буџетските корисници преку спојување, но и згаснување на повеќе институции согласно обврските кон Европската Унија. Ќе се укинуваат и кратат места во управни и надзорни одбори. Целта на Владата е Македонија конечно да добие мала, но ефикасна и сервилна администрација за граѓаните. Министерот за јавна администрација Горан Минчев најави пакет закони коишто ќе ја реформираат, департизираат и намалат пренатрупаноста во јавниот сектор. Сведоци сме дека постојат институции со по неколку вработени по партиска, роднинска или политичка линија и во наредниот период внимателно ќе разгледаме, ќе имаме и широка дебата и ќе пресечеме, подвлече министерот Минчев.
Главен акцент периодов ќе биде ставен на Академијата за јавна администрација во која ќе се обучуваат не само новите административци, туку и оние со долг стаж. Франција којашто има 80 годишно искуство во обука на административци и понуди помош на Македонија ставајќи ги на располагање обучувачите и искуството од нивниот Националниот институт за јавна администрација. Францускиот амбасадор во Македонија, Кристоф Ле Риголер вели дека најбитно од се е однесувањето на административецот кој треба да поседува и менаџерски способности. Во француското искуство на обучување, главен акцент е ставен на однесувањето и поведението на административецот.
Македонската јавна администрација со години е една од најчестите теми во јавноста. Со години проблемите се системски – политизација, нефункционалност, недоволна дигитализација и недоверба на граѓаните. Секој обид за реформа до сега наидуваше на отпор поради судир меѓу политичкиот и јавниот интерес.
Во јавниот сектор во Македонија се активни 1.371 институции, во кои се вработени 128.879 лица. Според Министерството за информатичко општество и администрација, во однос на 2022 година, бројот на вработените во институции од јавниот сектор за првпат е намален за 495. Анализите покажуваат дека со секоја промена на власта од 2018 година навака, имало значителен раст на административци.
