Непал ја доживува најкрвавата криза од укинувањето на монархијата во 2008 година. Протестите против корупцијата и забраната на социјалните мрежи прераснаа во насилни судири во кои загинаа десетици луѓе, а илјадници беа раселени.
Според полицискиот портпарол Бинод Јимире, оваа недела загинале најмалку 51 лице, меѓу кои 21 демонстрант и 3 полицајци. Ситуацијата во затворите целосно излезе од контрола – од околу 13.500 затвореници кои избегале, над 12.500 сè уште се во бегство.
Немирите започнаа во понеделник, кога полицијата отвори оган врз демонстранти и уби најмалку 19 лица. Насилството продолжи и следниот ден, кога демонстрантите ограбија јавни институции и го запалија парламентот, како и резиденцијата на премиерот.
Премиерот К.П. Шарма Оли поднесе оставка под притисок на случувањата. Армијата ја презеде контролата врз Катманду и воведе строг полициски час. Во тек се политички консултации за формирање на преодна влада, а како можен кандидат се споменува поранешната претседателка на Врховниот суд Сушила Карки. Сепак, состојбата останува неизвесна, додека земјата се обидува да најде пат кон политичка стабилност по овој крвав и турбулентен период.
