Израелскиот премиер Бенјамин Нетанјаху изјави дека нема да има палестинска држава.
„Ќе го одржиме нашето ветување – палестинска држава нема да има. Тоа место ни припаѓа нам“, рече Нетанјаху за време на посетата на населба на Западниот Брег.
„Ќе го зачуваме нашето наследство, нашата земја и нашата безбедност. Ќе го удвоиме бројот на жители на градот“, додаде израелскиот премиер.
Минатиот месец Израел одобри клучен проект за изградба на 3.400 станбени единици на Западниот Брег, кој Обединетите нации и неколку странски лидери го осудија како загрозување на можноста за решение со две држави.
Францускиот претседател Емануел Макрон во јули објави дека Франција ќе ја признае Палестина на седницата на Генералното собрание на Обединетите нации на крајот на септември. Канада, Австралија и Белгија соопштија дека ќе го сторат истото. Палестинската држава веќе ја признаа Ирска, Норвешка, Шпанија и Словенија.
