Полската армија за првпат собори руски беспилотни летала што влегле во нејзиниот воздушен простор. Полскиот премиер Доналд Туск смета на поддршка од НАТО и побара консултации со сојузниците. Тој го осуди навлегувањето на руските дронови како „провокација од големи размери“.
Владата на Полска побарала консултации со земјите-членки на НАТО согласно член 4 од Договорот, кој предвидува консултации меѓу членките доколку се смета дека е загрозена безбедноста или територијалниот интегритет на земја-членка. Нема непосредни извештаи за жртви и засега не е јасно колку беспилотни летала влегле во полскиот воздушен простор. Армијата соопшти дека бара соборени објекти.
Ова е првпат земја-членка на НАТО директно да дејствува против руски беспилотни летала во својот воздушен простор откако започна војната во Украина во 2022 година. Од руското Министерство за одбрана засега нема коментар.
Поради овој инцидент, Полска затвори четири аеродроми, вклучувајќи го и главниот државен аеродром во Варшава.
