Португалија е во шок и тага по трагедијата што се случи во Лисабон, при што 15 луѓе загинаа, а 18 се повредени откако познатиот трамвај „Глорија“ излета од шини.
Петмина од повредените се во сериозна состојба, додека 13 се здобиле со полесни повреди. Несреќата се случила синоќа во близина на авенијата „Либердаде“, една од главните улици во португалската престолнина. Се верува дека во возилото во тој момент се наоѓале 43 лица.
Властите соопштија дека меѓу загинатите има и странски државјани, но нивната националност сè уште не е потврдена.
Градоначалникот на Лисабон, Карлос Моедас, ја посети болницата и несреќата ја нарече „трагичен момент за градот“. Португалската влада прогласи ден на национална жалост, а претседателот Марсело Ребело де Соуза изрази „сочувство и солидарност со семејствата погодени од оваа трагедија“.
Жичницата „Глорија“ е едно од најпознатите обележја на Лисабон. Отворена е во 1885 година, а три децении подоцна е електрифицирана. Познатите жолти вагони се клучен дел од транспортот во ридестиот дел на градот.
