Претседателот на Кина, Си Џин-пинг, денеска и утре ќе биде домаќин на лидерите на Русија, Индија, Иран и Турција, заедно со дваесет други евроазиски лидери, со цел да покаже дека во ерата на американските царини и геостратешките тензии е можно поинаков, меѓународен модел на соработка, со Кина во центарот.
Рускиот претседател Владимир Путин изутрината пристигна во Кина, а индискиот премиер Нарендра Моди допатува вчера, што е негова прва посета на Кина од 2018 година – знак на зближување меѓу двата азиски гиганти. Индискиот премиер беше примен од кинескиот претседател.
Самитот се одржува во услови на неколку кризи – трговскиот конфликт на САД со Кина и Индија, војната во Украина, и иранскиот нуклеарен спор, меѓу другите. За време на самитот, Кина има намера да го покаже своето дипломатско влијание, но и воената моќ, претставувајќи се како столб на стабилност во поделениот свет.
Путин и неколку други учесници во среда ќе бидат сведоци на демонстрација на воената моќ на Кина, кога ќе се одржи грандизозна парада во Пекинг по повод 80-годишнината од крајот на Втората светска војна и победата над Јапонија. На парадата ќе присуствува и севернокорејскиот лидер, Ким Џонг Ун.
