Поповолни кредити за купување прв стан – Народната банка размислува да се креираат мерки со кој ќе им се олесни на граѓаните да го решат станбеното прашање, особено младите брачни парови кои со овие цени не можат да дојдат до сопствено живеалиште. Цените на становите вртоглаво растат, а проценката на гувернерот Трајко Славески е дека тоа веројатно се должи и на тоа што се купуваат станови кои остануваат празни со цел да се продадат подоцна со повисока цена. Од друга страна според анализите на Народната банка, половината од становите се купуваат во готовина, што создава притисок врз побарувачката и дополнително ги зголемува цените. Токму затоа Народна банка ќе предложи мерки до банките кои нема да ја нарушат стабилноста на банкарскиот сектор.
„ Најважна цел којашто си ја поставивме, а којашто произлегува и од мандатот на централната банка и е од општествен интерес, е да видиме како да се поттикне или да се овозможи поповолно кредитирање за објекти за живеење коишто се купуваат за првпат и ќе служат за живеење, затоа што е познато дека една третина од постојниот фонд на станови кај нас се празни“, вели гувернерот Трајко Славески во интервју на Newsmax Balkans.
Славески во интервјуто посочи дека за да го намалиме јазот со ЕУ економијата во Македонија треба да расте по 5 – 6 отсто годишно. Во моментов БДП на Македонија по глава на жител е 42 % од просекот на ЕУ. Клучот за забрзан раст, односно за да се надминат потенцијалните 4 % е во структурните реформи и во инвестициите во образованието, здравството и инфраструктура но и во човечки капитал.
. „Ако успееме да остваруваме раст од 5 или 6%, што е амбициозно, но остварливо, ќе можеме значително побрзо да ја постигнеме економската конвергенција со ЕУ“, изјави Славески.
Инаку првиот квартал Македонија го заокружи со раст од 3 % а според Славески се должи на агрегатната побарувачка, личната и јавната потрошувачка и инвестициите. Податоците за вториот квартал се очекуваат во септември, но актуелните показатели за раст на индустриското производство и за раст на извозот се охрабрувачки и доколку продолжат позитивните трендови дома, а не се случат глобални поместувања на пазарот може да се надмине и проекцијата.
