Во Музејот на Град Скопје ќе биде отворена изложба во чест и сеќавање на жртвите од катастрофалниот земјотрес што се случи на 26 јули 1963 година. Со оваа манифестација, Скопје ја одбележува годишнината од катастрофата во која загинаа 1.070 луѓе, а 3.000 беа повредени.
Поставката ќе биде од траен карактер и достапна за секој посетител во музејот.
Скопскиот земјотрес во 1963 е познат како една од најголемите трагедии во историјата на градот, но истовремено и како шанса светот да ја покаже својата солидарност и да помогне во опоравувањето на заедницата.
Катастрофалниот земјотрес се случи во пет часот и 17 минути, а помали потреси имаше до пет часот и 43 минути. Беа урнати 15.800 станови, а оштетени 28.000. Над 200.000 луѓе останаа без покрив над главата.
