Огромниот пожар што од вчера беснее на Кипар уништи населби, одзеде два животи и принуди стотици жители да ги напуштат своите домови.
Пожарот, кој изби во планинска област северно од Лимасол, се прошири на околу 10 илјади хектари, поттикнат од силни ветрови и високите температури.
Жителите се жалат на неорганизирана борба против пожарот и отсуство на систем за предупредување, кој сè уште не е воведен на Кипар.
Двајца луѓе беа пронајдени мртви во изгорено возило на пат за кој властите соопштија дека бил отворен. Се верува дека пламените јазици одеднаш го отсекле патот, намалувајќи ја видливоста на нула.
Шеснаесет лица беа префрлени во медицински установи, од кои двајца беа однесени во клиника во Никозија со сериозни изгореници.
