Кривичниот суд чека одговор од одбраната за да одлучува по жалбата на Јавното обвинителство да му се определи куќен притвор за напаѓачот на скопската градоначалничка Арсовска, со барање да се преиначи во затворски.
Рокот е 24 часа за одговор на жалба, по што судиите треба да оценат дали е оправдано барањето на обвинителството, кое смета дека постои опасност осомничениот да го повтори делото или да се даде во бегство.
Претходно, од судот пак во одлуката образложија дека мерката е куќен притвор поради тоа што се работи за скратена постапка.
За инцидентот во Чаир, осомничено е уште едно лице, на кое му беа одредени мерки за претпазливост. Арсовска е под 24-часовно полициско обезбедување.
Инцидентот со Арсовска во Чаир се случи кога таа заедно со вработени од градската администрација била во увид на објект кој нелегално се гради. Од Град Скопје преку соопштение известија дека и покрај увидот и поднесената пријава, продолжиле градежните активности.
