Бети Стаменкоска Трајкоска, пратеничка од редовите на ВМРО-ДПМНЕ гостуваше во емисијата ,,За или против“ на телевизија Алфа. Таа истакна дека прогласувањето на кризна состојба, значи дека Владата сериозно се справува со пожарите. Според неа, се преземаат мерки како нови вработувања, ангажирање невработени лица со финансиски надоместоци, со цел да се зголеми капацитетот на системот.
,,Денес Владата прогласи 30 дневна кризна состојба поврзана со проблемите околу пожарите. Се справуваме со она што го имаме и со кое што Македонија располага во моменталнава состојба“, рече Стаменкоска Трајкоска.
Стаменкоска Трајкоска истакна дека мора да се земе во предвид состојбата која беше наследена, односно целосна запоставеност од страна на претходната власт. Таа истакна дека обидот од ништо да се направи нешто и да се крене државата на нозе е многу долг и макотрпен предизвик.
,,Навистина макотрпно се работи во справување со сите овие проблеми коишто произлегуваат од пожарите, кои се од еден аспект едно секојдневие или природна работа во летниот период“, кажа Стаменкоска Трајкоска.
Таа истакна дека мерките што се преземаат вклучуваат нови вработувања и активности насочени кон спречување и навремено справување со пожарите.
,,Сето она што значеше и помош со нови вработувања, мерки кои што се преземаат со стимул за тоа невработените да учествуваат во помагање на овие проблеми поврзани со пожарите за да добиват одредени финансиски надоместоци и многу други мерки кои се превземаат едноставно само за да се спречи оваа стихија која се случува во текот на летниот период“, вели Стаменкоска Трајкоска.
Стаменкоска Трајкоска додаде и дека критиките опозицијата изнесени преку иронија и сарказам само се обид да се создаде деструктивност во јавноста, а притоа нема никаква пофалба за ангажманот на пензионираните лица, кои наместо да уживаат во својата пензија, се враќаат на терен да помогнат. Не се признаваат ни вклучувањето на дополнителни ресурси, ниту пожртвуваноста што се вложува во справувањето со кризата.
,,Се потсмеваат за тоа. Во ниту еден момент не слушнавме ние дека има оглас за 400 нови пожарникари ангажирање. Навистина се преземаат одредени мерки. Кога се работи се гради нештото, има надеж да се реши“, заклучи Стаменкоска Трајкоска.
