Бугарија доби зелено светло од лидерите на Европската унија да ја користи заедничката валута – евро – од 1-ви јануари 2026-та. Лидерите на самитот на ЕУ во Брисел го поддржаа предлогот на Европската комисија да ѝ се дозволи на Бугарија да стане 21-вата членка на еврозоната.
Сепак, претходно треба да бидат консултирани Европскиот парламент и Европската централна банка, пред Бугарите да можат да плаќаат во евра. Но тие чекори се сметаат за формалност.
Бугарија, како една од најсиромашните земји на Унијата, сè уште е на дното од 27-те членки во однос на бруто домашниот производ по глава на жител.
Воведувањето на еврото во Бугарија беше проследено со протести. Дури и бугарските пратеници се судрија во Националното собрание околу одлуката за приклучување на земјата во еврозоната.
