Претседателот на САД, Доналд Трамп, изјави дека ги „уништил“ главните нуклеарни објекти на Иран во воздушните напади извршени во текот на ноќта. Трамп, во телевизиско обраќање до американскиот народ, во придружба на потпретседателот Џеј Ди Венс, секретарот за одбрана Пит Хегсет и државниот секретар Марко Рубио, ги нарече нападите „спектакуларен воен успех“, при што биле уништени трите главни ирански нуклеарни објекти — Натанц, Исфахан и Фордо.
Трамп ја предупреди иранската влада дека ќе се соочи со уште посилни напади доколку не прифати мир.
Од друга страна, високи ирански извори изјавија за Ројтерс дека поголемиот дел од високо збогатениот ураниум на локацијата во Фордо бил отстранет пред нападот на САД. Ројтерс исто така објави дека бројот на персонал во подземниот објект во Фордо е намален на минимум, а пред неколку дена во областа на овој нуклеарен објект биле видени камиони кои веројатно ваделе ураниум.
Иранските власти тврдат дека објектите претрпеле само површна штета.
„Настаните од утрото се скандалозни и ќе имаат долгорочни последици“, изјави иранскиот министер за надворешни работи Абас Аракчи, нарекувајќи ги американските напади тешко кршење на Повелбата на ОН, меѓународното право и договорот за неширење на нуклеарно оружје.
„Иран ги задржува сите опции за одбрана на својот суверенитет, интереси и народ“, изјави шефот на иранската дипломатија.
Одговарајќи на прашања од новинари на денешната прес-конференција во Истанбул, Аракчи рече дека утре во Москва ќе се сретне со претседателот Владимир Путин.
„Русија е пријател на Иран. Имаме стратешко партнерство и секогаш се консултираме едни со други и ги координираме нашите ставови“, рече Аракчи.
Генералниот секретар на Обединетите нации, Антонио Гутереш, изрази длабока загриженост за употребата на сила од страна на САД, предупредувајќи дека ова претставува опасна ескалација во веќе напнатиот регион. Тој повика на воздржаност и дијалог за да се избегнат катастрофални последици.
