Во центарот на Софија денеска се одржаа масовни протести против планираното воведување на еврото како официјална валута во Бугарија. Дел од демонстрантите се обидоа да ја пробијат полициската заштита и да влезат во зградата на националното собрание, но беа спречени од безбедносните сили.
Протестите се одржуваат во момент кога во главниот град пристигнуваат претставници на Европската комисија, кои треба да го презентираат извештајот за конвергенција – документ што ќе даде проценка за подготвеноста на Бугарија за влез во еврозоната. Објавата е закажана за 14 часот.
Бугарската влада неодамна најави нова иницијатива за приклучување кон еврозоната до јануари 2026 година. Првичниот план беше еврото да се воведе уште во 2024 година, но процесот беше одложен поради високиот процент на инфлација, кој во одреден момент достигна 9,5%.
