Денеска остваривме конструктивна и отворена средба со претставници на Синдикатот за образование, наука и култура (СОНК), каде што разговаравме за прашања од значење за вработените во установите за згрижување и воспитание на деца.
Меѓу темите кои ги разгледавме беа:
– Потребата од подобрување на материјалниот статус на вработените;
– Унапредување на условите за работа и организацијата во градинките;
– Прашања поврзани со колективните договори и законската рамка за детска заштита;
– Можности за проширување на капацитетите преку изградба на нови градинки во различни општини, со што би се придонело кон порамномерно распределување на децата и намалување на притисокот врз постојните установи.
Во насока на продолжување на дијалогот, разговаравме и за можноста за формирање работна група во која би биле вклучени претставници на синдикатот, вработени од областа на детската заштита и релевантни стручни лица.
Министерството останува отворено за соработка и размена на мислења, со цел преку конструктивен пристап да придонесеме кон постепени подобрувања во системот на детска заштита.
Веруваме дека преку заеднички ангажман и редовна комуникација, можеме да ги идентификуваме предизвиците и да работиме на реални и одржливи решенија во интерес на вработените и децата, објави Ѓоко Велковски, заменик министер за социјална политика, демографија и млади.
