Од денеска 27 повредени во дискотеката Пулс започнаа со рехабилитација во Општата болница во Кочани. Со нив, бројот на млади луѓе, кои по трагедијата се опоравуваат од повредите во болницата во Кочани, се искачачи на 38. Во дневна амбуланта, тие се распоредени на одделенијата за неврологија, хирургија и физикална терапија. Нивната здравствена состојба е стабилна, наведуваат од болницата. Повредени се рехабилитираат и во штипската Клиничка болница.
„Во моментот немаме примено, но се водат во дневна болница еден или двајца пациенти што доаѓаат„ изјави д-р Владко Захариев, директор на КБ-Штип.
Во меѓувреме петмина вработени во штипската Физикална терапија, се на обука во кочанската Општа болница. Веќе десетина денови црпат искуство од искусни колеги од Велика Британија и Шпанија, како успешно да ги рехабилитираат изгорениците и фрактурите со кои младите луѓе се здобија по несреѓата во дискотеката Пулс ..
„Обуката трае веќе десетина дена. Имаме испратено пет лица. Едниот е физијатар, двајца физиотерапевти и две медицински сестри. Во моментот се на обука и работат парцијално со пациенти кои се препраќаат од Клиниката за пластична хирургија во Скопје„ изјави д-р Владко Захариев, директор на КБ-Штип.
Од денеска во кочанската болница во функција е ставена и хипербарната комора , која болницата ја доби како донација. Според експертите, ваквата терапија ќе овозможи брза и успешна ревитализација на кожата со изгореници, како и интоксикација на организмот, по вдишувањето на чадот во дискотеката. Еден час во хипербаричната комора заменува 7 до 10 дена престој на планина.
