Заменик-министерот за внатрешни работи, Астрит Исени, оствари работна средба со амбасадорот на Република Бугарија во земјава, Жељаско Радуков, соопштија денеска од Министерството за внатрешни работи.
На средбата биле потврдени заложбите за одржување и унапредување на односите меѓу двете соседни земји, при што била нагласена и одличната соработка меѓу двете министерства за внатрешни работи. Како што било заеднички констатирано, во нив работат врвни професионалци кои ја олеснуваат и зајакнуваат меѓусебната комуникација и партнерство.
„Особен акцент беше ставен на можностите за дополнително унапредување на веќе воспоставената плодна соработка, како во рамките на билатералните договори, така и во оперативниот сегмент на делувањето на министерствата. И заменик-министерот Исени и амбасадорот Радуков изразија целосна подготвеност и отвореност за натамошно продлабочување на оваа соработка“, се наведува во соопштението од МВР.
Дополнително, на состанокот се разговарало и за заедничката соработка во рамки на меѓународни организации и регионални иницијативи од заеднички интерес, кои придонесуваат за одржување и јакнење на регионалната безбедност, стабилност и просперитет.
