Поранешната претседателка на Антикорупциската комисија, Билјана Ивановска, побара итна оставка од актуелната претседателка Татјана Димитровска, која е осомничена за оддавање службена тајна во случајот „Адитив“. Според Ивановска, институцијата претрпела сериозен удар, а одговорноста треба веднаш да се преземе.
„Ова не е време за седење со скрстени раце. Собранието е на потег“, изјави Ивановска, повикувајќи на внатрешна проценка на ризици од корупција и зголемување на интегритетот во Комисијата.
Од Кабинетот на претседателот на Собранието соопштија дека ќе се воздржат од прерани коментари, но доколку наводите се потврдат во судска постапка, ќе се иницира разрешување на Димитровска.
И поранешниот член на Комисијата, Владимир Георгиев, смета дека вината е индивидуална, но случајот влијае негативно врз угледот на институцијата. „Довербата тешко се стекнува, а лесно се губи“, истакна Георгиев.
Сличен став има и министерот за дигитална трансформација, Стефан Андоновски, кој рече дека не гледа основа за колективна одговорност, но оценува дека е непримерно Димитровска да остане на функцијата додека трае истрагата.
Од Антикорупциската комисија уверуваат дека ќе продолжат да работат со целосна транспарентност и соработка со институциите.
Истрагата во случајот „Адитив“ се однесува на злоупотреби при јавни набавки на адитиви за јаглен за потребите на РЕК Битола и РЕК Осломеј. Обвинителството товари 31 физичко и 5 правни лица за перење пари и изигрување на набавките преку пререгистрација на фирми.
