Советот на Европската унија денес донесе одлука за одобрување на 15 милиони евра помош во рамките на Европскиот мировен инструмент (ЕПФ) за унапредување на одбранбените капацитети и оперативната подготвеност на Армијата на Република Македонија.
Оваа помош ќе се користи за набавка на различна воена опрема, вклучително и опрема за разузнавање, надзор, извидување и електронско војување, како и за комунални и инженерски возила, комуникациски и информациски системи и опрема за борбена обука. Високата претставничка за надворешни работи и безбедносна политика на ЕУ, Каја Калас, изјави дека оваа поддршка ќе ја зајакне Македонија во нејзиниот придонес кон регионалната стабилност и безбедност, што е од клучно значење не само за Западниот Балкан, туку и за самата Европска унија.
Со оваа одлука, вкупната помош за Македонија преку ЕПФ достигнува 38 милиони евра, вклучувајќи и билатералните пакети за поддршка од 2023 и 2024 година. Поддршката од ЕУ продолжува да го потврдува континуираниот ангажман на Унијата за безбедноста и одбраната на земјата, со цел да се зајакне нејзината подготвеност и капацитети за учество во меѓународни операции и мисиите на заедничката безбедносна и одбранбена политика на ЕУ.
ЕУ го истакна својот ангажман и со потпишувањето на Партнерството за безбедност и одбрана со Република Македонија во ноември минатата година, што го одразува целосното усогласување на земјата со заедничката надворешна и безбедносна политика на Унијата. ЕУ, исто така, најави дека ќе продолжи да го поддржува развојот на оперативната способност на Армијата на Република Македонија преку обука и техничка помош, со цел да се зголеми нејзиниот потенцијал за учество во глобалните безбедносни напори и операции.
