Велигден е ден на духовна радост и семејна трпеза, а варените јајца се неизоставен дел од празничната традиција. Сепак, стручњаците потсетуваат – умереноста не значи одрекување, туку грижа за сопственото здравје и добросостојба.
„Едно јајце за кршење, едно за појадок, можеби уште едно во салата – и тоа е сосема доволно,“ велат нутриционистите, нагласувајќи дека празникот може да се прослави и без претерување, киселини и мачнини.
Јајцата се навистина хранлива намирница – богати со висококвалитетни протеини, витамини Б12 и Д, железо и здрави масти. Средно варено јајце содржи околу 70 калории и приближно 200 мг холестерол, што е важно за луѓето кои имаат проблеми со срцето или жолчното кесе.
Според Светската здравствена организација и бројни нутриционисти, здрав возрасен човек може да конзумира 1–2 јајца дневно без здравствени ризици, се додека има избалансирана исхрана и активен начин на живот.
Но за време на празниците, кога масата е полна со храна, експертите предупредуваат – внимавајте со количината. Три до четири јајца во еден ден се горната граница која не треба да се надмине, особено ако јајцата се дел од богат и калоричен ручек.
