24 годишниот Стојанче Стефанов e 62-та жртва од пожарот во Кочани. Тој беше на лекување во Воено-медицинската академија во Белград каде им подлегна на тешките повреди и изгоренеци здобиени пред еден месец.
„Станува збор за пациент кој од првиот ден согласно извршената првична тријажа од медицинските тимови е веднаш упатен во ВМА во Белград и кој беше интубиран и во критична состојба изминатиов месец“ вели Јовица Андовски, заменик-министер за здравство
Стојанче Стефанов имал 27 проценти зафатеност со изгореници на телото и имал сериозни повреди од вдишување на чад. Во ВМА бил веднаш опериран на четврти април и поставен на ЕКМО апарат, но, поради огромната количина од чад што ја вдишил бил во тешка состојба.
Во моментов низ болниците во странство се лекуваат 45 повредени во пожарот во дискотеката „Пулс“, а од нив двајца се во тешка состојба. Нивната состојба денеска е стабилна.
На 16 март загинаа 59 пациенти, а во текот на месецов битката ја загубија тројца тешко повредени пациенти, кои се лекуваа во болниците во странство.
Давид Крстевски
