Православните Христијани денеска го одбележуваат Велики Четврток, денот на Тајната вечера, на светата причест, на предавството… Домаќинките утрото од рано в зори, пред изгрејсонце започнаа со бојадисување на првите три велигденски јајца.
„На денешниот ден Велики Четврток вапцуваме три јајца, претежно мора да се црвени, затоа што црвената боја претставува крвта на Исус Христос… Пред изгрејсонце се вапцуваат јајцата затоа што се верува дека ако изгрее сонцето, јајцата ќе се расипат, првото јајце е наклонето за Господ и е во црвена боја поради господовата крв, второто јајце е за домаќинот, а третото јајце е за бериќет и за стоката“ вели Снежана Миловановска
Според традицијата на Велики Четврток жените најмногу време поминуваат во своите кујни каде што ги вапсаат велигденските јајца и ги финишираат подготовките за велигденските празници.
„Традиционално се кршиме со јајца, јас обично фарбам јајца околу 60-тина, затоа што имаме дечиња, па децата сакаат и цела корпа да ја искршат, па претежно за нив правам во боја до декопаж, сепак тие се радуваат“ вели Снежана Миловановска
Утре е Велики Петок, ден на распетието и на страдањето, на смртта и погребението на Исус Христос. Тоа е најтешкиот и најтажниот ден во годината кога тишината е најгласна.
Давид Крстевски
