Низа пропусти во законот за угостителска дејност утврди Антикорупциската комисија, по трагедијата во Кочани. Комисијата самоиницијативно ги проверила, покрај тој за угостителска дејсност, и законите за инсепкциски надзор и за заштита и спасување. Итно ги повика надлежните да направат ревизија и измени на правната регулатива. Според нив, неопходно е прецизирање на законските членови со кои се уредува издавањето лиценци за угостителските објекти, бидејќи според антикорупционерите има недоречености, нејасни правила, судир меѓу законите и недозволени дискрециони овластувања.
- „Неопходно е да се пропише обврска ДПИ да изврши увид во определен рок, на пример 15 дена, како и санкции во случај на невистинито пријавување вклучувајќи можност за казна или одземање на одобрението“- истакна претседателката на ДКСК, Татјана Димитровска која ги образложи резултатите од анализата на Законот.
И кај казните има недоречености. Според Антикорупциска, висината на глобите не е сразменарна со тежината на можните последици, особено во однос на заштитата на живтот, здравјето и безбедноста на луѓето.
- „Ова создава правна колизија и води кон правна несигурност во постапувањето на инспекторите и остава простор за различна, призволна примена на инспекциските овластувања. И во делот на прекршочните одредби е утврден регулаторен ризик. Висината на глобите не е сразмерна со тежината на можните последици особено кога прекршувањата се однесуваат на заштитата на животот, здравјето и безбедноста на луѓето. Се препорачува да се преиспитаат прекршочните одредби за да се обезбеди сразмерност меѓу висината на глобите и сериозноста на последиците, особено кај прекршувањата се однесуваат на здравјето и безбедноста на луѓето. Треба да се примени и трикратниот износ на глоба за сериозни прекршоци“- истакна претседателката на ДКСК.
Ваквите слабости создаваат простор за корупција, злоупотреба на дискрециски овластувања и нееднакво постапување кон различни субјекти во идентични или слични ситиации, сметаат антикорупционерите.
