Во текот на викендот, на 12 и 13 април, во преполната сала на Македонската филхармонија по 22-ри пат се одржа детскиот музички фестивал „Поточиња“. Шестте претстави, распродадени до последно место, беа исполнети со детска радост, песна и аплаузи, а атмосферата беше магична од првиот момент.
Со почетокот на фестивалската химна, децата во публиката ги дочекаа своите врсници на сцената со голема еуфорија и искрени насмевки. Веднаш потоа, маскотата и водител на фестивалот – Поки, во изведба на актерот Мартин Јорданоски, ја крена публиката на нозе. Веќе со првата песна, „Дајте сите рачиња“, салата одекна од громогласен аплауз.
На сцената се изведоа 17 нови песни од фестивалскиот репертоар, а интересот и вниманието на најмладите не стивна до самиот крај. Последната композиција „Стоп за војните“ испрати силна и искрена порака за мир и подобар свет – токму она што детските срца го чувствуваат најдлабоко.
Оваа година, „Поточиња 2025“ носеше и хуманитарна димензија. Целокупниот приход од продажбата на фестивалската дискографија, како и дел од средствата собрани од билетите, ќе биде дониран за настраданите од трагичната несреќа во Кочани.
