Во 21 век европска земја негира јазик и идентитет на нејзин сосед и тоа нема никаква врска со европските вредности. Премиерот Христијан Мицкоски од Минхен порача дека потребна е поголема поддршка од Брисел за македонските евроинтеграции кои се условени со вештачки проблем – проблемот кој го наметнува нашиот источен сосед. Наместо поддршка, Бугарија билатералните спорови ги носи во Европската унија, и поради тоа, имаме балканизација на Европа наместо европеизација на Балканот. Мицкоски на панел дискусијата во рамки на Минхенската безбедносна конференција порача дека Македонија има направено премногу отстапки и компромиси во минатото, и се уште е далеку од европското семејство.
Парламентот на една од најмладите земји-членки на ЕУ го негира македонскиот идентитет, го негира мојот мајчин јазик, Македонскиот јазик. Зборуваме за мали земји, срцето на Балканот со помалку од 2 милиони луѓе кои сакаат да бидат дел од европското семејство. И тие не се во можност да бидат дел од европското семејство затоа што некој, како што кажавте, малку поголем влезе на масата на ЕУ претходно, пред мојата земја – нашиот источен сосед. Сега се соочуваме со многу проблеми со нашиот источен сосед, со Бугарија, порача Мицкоски.
Мицкоски порача дека Македонија стана членка на НАТО со големо страдање и понижувања бидејќи го промени уставното име поради Грција, а сега повторно имаме услови и уцени од другиот сосед, Бугарија.
Затоа вели тој, кога се говори за двојни стандарди во политкиката треба да се има предвид македонското прашање, затоа што две декади кандидатскиот статус не може да се претвори во членство заради вештачките прашања кои се отвораат.
Овие ставови, Мицкоски ги изнесе на панел дискусијата Геостратегија и енергетска сигурност во рамки на Минхенската безбедносна конференција.
Мицкоски во Минхен се сретна со претседателот на Европскиот Совет, Кошта, со претседавачот на Минхенската конференција за безбедност, Кристоф Хојзген и хрватскиот колега Пленковиќ. Како што информираа од владината прес служба на сите средби ги истакнал заложбите за реформи и европеизација на Македонија, со цел побрзо да станеме членка на ЕУ.
