Сојузот на борците од НОБ од Тетово поднесе иницијатива за оценување на уставност и законитост на одлуката на советот на Општина Тетово за промена на имињата на улиците, плоштадите, мостовите и другите инфраструктурни објекти во градот.
Од сојузот образложуваат дека одлуката на општината е спротивна на Уставот, како и спротивна на Законот за определување на имиња на улици, плоштади, мостови и други инфраструктурни објекти, но и законот за употребата на македонскиот јазик.
„Очекуваме Уставниот суд одлуката да ја укине како неуставна и незаконита. Спорноста на одлуката произлегува од нејзината едностраност, односно истата е донесена без исполнување на законскиот услов – претходна согласност од Владата. Спорната одлука и покрај тоа се применува од страна на Општина Тетово и нејзините јавни претпријатија, иако државните органи не ја применуваат, поради што произлегува и потребата од постапка за нејзино укинување, велат од Сојузот на борците од НОБ.
Оттаму посочуваат дека покрај немањето согласност од Владата оспорената одлука е спротивна на законот бидејќи за одредени улици утврдила име користејќи странски јазик, а истото е испишано на кирилско писмо. По најавата на Општина Тетово за преименување на нови улици, општинската организација на Сојуз на борците од Тетово испратија отворено писмо до тетовскиот градоначалник во кое бараа да нема преименување на градските улици кои носат имиња од антифашистичкото минато на македонскиот народ.
