Единствената политичка партија на македонската заедница во Албанија, Македонска алијанса за европска интеграција, изразува длабока загриженост и остро реагира против етикетирањето на македонската заедница во Албанија како „Северномакедонци“ од страна на амбасадорката на Албанија во Софија, Инид Мило.
Партијата бара јавно извинување од амбасадорката, а нивната реакција ја испратиле и до министерот за Европа и надворешни работи, Игли Хасани. Во него е објаснето дека во интервју за бугарската медиумска куќа „NOVA.BG“, амбасадорката Мило за македонското малцинство користи терминологија која „не само што е неприфатлива, туку и навредлива за идентитетот и интегритетот на оваа автохтона заедница“.
Партијата на македонската заедница потсетува и дека ова не е изолиран случај. Минатата година, при објавувањето на резултатите од пописот, и Албанскиот институт за статистика го користеше терминот „Северномакедонци“ за македонското малцинство, предизвикувајќи силни реакции кај македонската заедница таму.
