Српскиот патријарх – Порфириј, ќе присуствува на свеченоста по повод Свети Сава, националниот празник на Српската заедница во Македонија, која ќе се одбележи вечерва во Македонскиот народен театар во Скопје. На Светосавската академија, Српскиот патријарх ќе пристигне заедно со архиепископот – Стефан.
Претседателката Гордана Сиљановска-Давкова упати честитка до припадниците на Српската заедница:
„Упатувам сречни честитки за празникот Свети Сава ‒ националниот ден на Србите во Македонија. Најискрено посакувам – големиот празник да го поминете во хармонија и радост, исполнети со љубов и среќа. Свети Сава несомнено е една од најзначајните личности во српската национална, образовна, културна и духовна историја. Првиот српски архиепископ остави дело кое ги надминува националните граници и, како такво, е почитувано од сиот православен словенски свет. Српската заедница во Македонија, како и Македонската во Србија, се дополнителен мотив за градење и за негување блиски и пријателски односи меѓу двете држави“, вели претседателката Сиљановска-Давкова во честитката по повод празникот Свети Сава.
