Српскиот патријарх Порфириј ќе присуствува на свеченоста што по повод Свети Сава, националниот празник на српската заедница во Македонија, ќе се одбележи утре 27-ми јануари во Македонскиот народен театар во Скопје.
Во пресрет на утрешното главно одбележување, вечерва во Куманово ќе се одржи Академија по повод Свети Сава на која ќе биде присутен министерот за односи меѓу заедниците Иван Стоилковиќ, а од Србија, министерот за дијаспора.
Академијата ја организира Демократската партија на Србите од Македонија и локалната српска заедница.
Стоиљковиќ неодамна најави дека на Светосавската академија патријархот ќе пристигне заедно со архиепископот Стефан.
„Ќе имаме можност двајца црковни великодостојници да ја уважат академијата и да го уважат денот и на некој начин да го заокружат процесот што го почнавме уште во 2007 година со прослава на националните празници во земјава“, рече тој.
Според него, ова е порака на помирување на регионот и соработка која ќе наиде на позитивен однос од целата македонска јавност.
