Бизнисмените во новата година влегоа со поголема доза на оптимизам, но и со очекувања за подобра деловна клима и даночна предвидливост. Во 2025-та година остануваат истите предизвици – борба со корупцијата и со нелојалната конкуренција, борба за поголема продуктивност и за забрзан развој. Планираат нови инвестиции и раст на производството. За нив, во вистинско време доаѓаат 250-те милиони евра од унгарскиот заем. Без овие пари за кои ќе можат да аплицираат под исклучително поволни услови, нивните планови тешко ќе можеле да се реализираат.
Бизнисот се надева дека новата власт конечно ќе стави ред и ќе се намали сивата економија што достигнува енормни 40%. Задоволни се од наплатата на приходи во втората половина од минатата година. Очекуваат дигитализацијата и воведувањето на е-фактура делумно да ја сузбијат нелојалната конкуренција која не ја полни државната каса.
За бизнисот ветер во грб се и најавените капитални инвестиции. Изградбата на патишта, пруги, гасоводи и тоа како треба да го забрза протокот на стоки и да им ги намали трошоците.
Сепак, во минатото беа сведоци на слаба реализација на планираното. Бизнисот бара поголема одговорност од оние кои ги кочат проектите.
На стопанството му недостигаат околу 10.000 работници годишно, а најпогодени сектори се градежништвото и туризмот. Бизнисмените очекуваат новиот закон за средно образование да реши дел од проблемите со кусокот на кадар, со форсирање на дуалното образование.
Годинава бизнисмените ќе им даваат и повисок минималец на работниците, потег кој неминовно ќе повлече и зголемување на останатите плати во земјава. Дел од коморите велат дека без проблем минималната плата може да се покачи и на 500 евра, под услов да се намалат дел од придонесите. 2025-та почнува со проекција за раст од 3.7% и инфлација од 2,2%. Желбите за годинава конечно треба да се остварат – подобра инфраструктура, поажурна администрација, повеќе кредити за фирмите, повисок животен стандард за граѓаните.
