Јаков е првото бебе родено во 2025, но и прва среќа во семејството Догазански. Малиот јунак дојде на свет во првата минута после полноќ и е најубавиот новогодишен подарок за неговите родители. 32 годишната Сања Талевска Догазанска го родила Јаков со царски рез, со тежина од 3 килограми и 190 грама. А ноќта со неа своите рожби ги добиле уште пет мајки.
За докторите од ГАК, ова е знак дека нѐ чека убава година.
“Ако денот се познава по утрото можам да кажам дека ќе имаме навистина плодна и бериќетна година, затоа што само една секунда по Новата година ние го породивме Јаков. На свет дојде жив машки плод со родилна тежина од 3190 грама и 50 см. Мајката е Сања Талевска. Јаков по името навестува убава и јака година, која се надевам на сите ќе ни биде плодна и бериќетна Им посакувам на Сања и Јаков да имаат среќни и успешни мигови”, рече директорката на Клиниката Ирена Алексиоска Папестиев.
Неколку секунди по Јаков, се роди и женско бебе во болницата Чаир. Аја е второ дете на нејзините родители, родена 3.110 грама со 50 сантиметри.
За многу рожби и среќни родители треба и добра стратегија за пораст на наталитетот порачаа надлежните.
Јаков и Аја освен министрите ги посетија и сопругата на премиерот – Рози Мицкоски. И жената на министер Таравари. Двете бебиња добија по два златника, едниот подарок е од Министерството за труд, другиот од семејството на претседтаелот на Владата – Мицкоски.
