Како одминуваат последните денови од оваа веќе изветвена 2024 година, така расте предновогодишната еуфорија и во градот под Марковите Кули. На платото под вековниот симбол на градот – Градскиот саат, од денеска, па во наредните три дена, по втор пат, се одржува Новогодишниот базар. Интересот огромен, на задоволство и на граѓаните, но и на излагачите.
„Годинава имаме многу поголем број на изложувачи, околу 30. Има од домашни преработки, сувомесни производи, мед, сирење, декорации, украси…Бенефитот е тој што малите производители можат да се промовираат тука, дома. Најчесто производителите ни се од Прилеп, од околните градови, Кавадарци, Неготино..Овие производи ни се посебни, направени се со повеќе љубов, повеќе труд е вложено во нив“, – рече Тодорка Наумоска – Димески, претседател на „Слоуфуд“, Прилеп.
„Она кое што сите го очекуваа и бараа, се надевам ќе излезе во пресрет на потребите на нашите граѓани. Овде има изложено производи кои што самите производители ги нудат на консументите“, – кажа Гоце Бумбароски.
„Голема е користа затоа што ова е единствена можност да ги промовираме нашите производи“, – посочи Гоце Станоески, производител од „Сарика Винарија“.
„Изработувам рачно накити од полимерна глина и смола. Изработувам илустрации, постери, торби, маици…И се надевам дека ќе ги следиме европските трендови на новогодишни базари“, – кажа Ема од „Урбен Ера“.
Новогодишниот базар, како лани, така и годинава е поддржан од Општина Прилеп. Интенцијата на локалните власти е оваа манифестација да прерасне во традиционална.
„Нашите производители ги изложуваат и своите производи, интересни работи кои исто можат да послужат како новогодишен пидарок. Збогатена е програмата со многу забава, музика, расположение, детско катче, тука ни е и Дедо Мраз за најмчадите. За секоја генерација има интерсни моменти“, – изјави Борче Јовчески, градоначалник на Прилеп.
Од ЛС најавуваат и богата новогодишна програма во очи на Новата година која ќе се одржи на Градскиот плоштад со настап на неколку познати музички артисти, а ќе има и други новогодишни содржини наманети за сите генерации.
Каролина Дурло
