До крајот на месецот ќе бидат поставени типските куќи кои ќе бидат нов дом за четириесете ромски семејства кои во моментот живеат во супстандардни услови во објектите на старото Нервно одделение во Штип. Со нивната изградба ќе се реши станбениот статус на 260лица , од кои половина се деца. Според динамиката на градежните активности, се очекува на почетокот од новата година да бидат дадени во владение на новите корисници.
„Од информациите кои ги имам од страна на операторот, се очекува следните недели да бидат поставени и веднаш штом ќе бидат поставени според временските прилики, некаде на почетокот на 2025 че бидат доделени на корисниците„ изјави Иван Јорданов, градоначалник на Штип.
Дополнително, со општински пари ќе бидат изградени уште седум типски куќи за семејства кои живеат во објекти по трасата на булеварот „Партизанска„ кој е во финална градба. Откако ќе се иселат станарите, објектите ќе бидат урнати и овој дел целосно ќе се урбанизира
„И за овие седум објекти се планирани седум типски куќи коишто ќе бидат сместени на оваа локација. Со ова булеварот ќе додаде нова вредност и да го урбанизира целиот тој потег и сите парцели наоколу да бидат соодветно уредени. Дел од нив ќе бидат зона за домување и за комерцијални намени„ изјави Иван Јорданов, градоначалник на Штип.
Предвидени се четири типа на куќи, со различна квадратура и ќе се распределуваат по бројот на членови во семејството. Изградбата на оваа мини населба во месноста Света Недела, во Штип, е децениски проект. Чини околу 600.000евра , а средствата се обезбедени од Европската Унија.
Александра Ристевска
