Нефункционалноста на јавниот сообраќај, паркови и зеленило, водовод и неподнесувањето на предлог буџетот за 2025 година и самоволието на градочалничката Данела Арсовска се главните причини за измени на законот за локална самоуправа со кој граѓаните преку референдум ќе имаат можност да го одземаат мандатот на градочалниците. Дополнително од ЗЕЛС ја оставија отворена можноста поради лошата состојба во Град Скопје да и бидат одземени ингеренциите на Арсовска во повеќето градски претпријатија за што најавија и работни средби со премиерот Христијан Мицковски.
“Таа тема ги засега сите Скопјани. Тоа не е единственото прашање кое што предизвикува голгота за Скопјани. Ние имаме исто така проблем и со комуналната хигиена, паркови и зеленило, имаме проблем и со нефукционалноста, за жал, за прв пат и со водовод и канализација од кого направија загубар, што што досега не се случило цели 30 години. Како ЗЕЛС, како управен одбор до крајот на годинава ќе имаме средба и со владата и со претседателот на владата” изјави претседателот на ЗЕЛС Орце Ѓорѓиевски.
Во имплементација на законските измени за локална самоуправа ќе бидат вклучени експерти од централната и локална власт, како и целата експертска јавност. Од ЗЕЛС активно работат на дополнувањата и измените со кој градочалниците ќе имаат ограничена моќ.
“Не е доволно да направиме решенија како што имало често пати примери во минатото. Нас ни треба темелна реформа во перспектива на долгорочен план што ќе биде во интерес на граѓаните и ние да им служиме на граѓаните” изјави Ѓорѓиевски.
На денешната редовна седница на заедницата на единици на локална самоуправа исто така беше потврдено дека е изработен и предлог закон за комунална полиција со кој ќе бидат предвидени глоби за правни и физички лица кои ќе ја загрозуваат животната средина. Глобите ќе се движат од 4000-6000 евра. Во имплементацијата на законот ќе биде вклучено и министерството за внатрешни работи за што Ѓеорѓиевски најави средби со министерот Панче Тошковски.
Даниел Ѓорѓевски
