Уролошкото одделение во прилепската Општа болница се опреми со два современи дијагностички сета за точно и прецизно дијагностицирање на повеќе видови уролошки заболувања, вклучително и на најтешките. Набавката на овие исклучително важни медицински инструменти била насушно потребна, бидејќи, како што рече началникот на одделението, досегашните, одамна си го отслужиле својот век што пак, претставувало дури и сериозен ризик по здравјето на пациентите. Инструменитите се набавени со донацијата од 600.000 денари од Прилепската пиварница.
„Најургентно набавивме два комплетни цистоскопи, односно и работен дел, и телескоски дел, кошулица, оптуратор и оптика со мост, без кој што практично е невозможно нашето функционирање како оддел…Постоеше и ризик да го прекинеме дијагностицирањето на основните уролошки состојби, односно патолошки состојби кај нашите сограѓани, така што оваа донација дојде како мевлем на рана“, – истакна д-р Трајче Јанкулоски, уролог и началник на Уролошкиот оддел.
„Годинава, во духот на одбележувањето на 100 години од Прилепска пиварница, одлучивме донацијата да ја направиме на Одделението за Урологија при општата Болница- Прилеп и нашата грижа и солидатност за градот да биде пример за тоа како треба сите успешни компании во нашата општина ја поддржуваат општината и сите нејзини дејности во градот“, – посочи Сашо Самарџиоски, ген. директор на Прилепска пиварница и донатор.
„Најискрено сме благодарни на оваа донација, на овие најнеопходни инструменти кои ќе помогнат при дијагностика и лекување на пациентите од Урлогија“, – кажа д-р Кире Јоноски, директор на Општата болница – Прилеп.
Инаку, во прилепското Уролошко одделение во моментов работат тројца уролози. За скоро време во тимот треба да влезе уште еден уролог-специјализант, што според зборовите на началникот на Одделот, ќе биде сосема доволно за околу 120-те илјади граѓани од Прилеп и од неколкуте соседни општини да добиваат квалитетна и високо-стручна здравствена грижа од областа на урологијата. Засега, прилепското Уролошко одделение е високо на македонската здравствена листа со над 40 сложени операции за 2024 година.
Каролина Дурло
