Македонија гори, последниве денови дивеат пламени јазици на неколку локации ширум државата. Евидентирани се 10 пожари на отворено во изминатото деноноќие, а од нив активни се три. Гори кај Градско и во околината на Ново Село, но најалармантна е состојбата во Неготино. Загрижувачки станува и пожарот кај Огражден, кој е во близина на бугарската граница кој е многу тешко достапен за гаснење.
Според Центарот за управување со кризи, олеснително е што по одлуката на Владата дирекцијата за заштита и спасување потпиша договор со двајца пензионирани пилоти на авионите ер трактор и тие од денеска се вклучуваат во гаснењето на пожарот во неготинскиот крај. Освен хеликоптерите на МВР и АРМ на располагање во гаснењето на пожарите се и три „ертрактори“ во сопственост на Дирекцијата за заштита и спасување,но тие досега беа нефункционални.
Од Центарот за управување со кризи велат дека засега успешно менаџираат со хеликоптерите на полицијата, но сметаат дека високите температури ќе предизвикаат проблеми за потешко справување со огнените стихии.
Од штабот за заштита и спасување излегоа со апел до граѓаните од Неготинскиот крај, таму каде што е најопасно Пештерница, Бела Вода, Калањево, Липа, Брусник и околните места да ги напуштат домовите поради опасност од ширење на пожарот.
