Прво ревизорски извештај па потоа потпис за проектот Универзална. Новиот министер за култура Зоран Љутков најави дека ревизорите ќе ја прочешлаат целата постапка за рекострункција на објектот од големо културно значење за главниот град. Додека трае проверката, министерството нема да одобри никакви активности за салата. Од Град Скопје, министерството се уште не добило никакви документи за опожарениот објект , што за Љутков е многу сомнително.
„Целата постапка во однос на преземањето на Универзална сала на Министерството за култура од Град Скопје е доста проблематична и јас не би сакал да го ставам мојот потпис на ниту една потамошна акција која ќе се случува со салата. Испративме допис до Државниот завод за ревизија, да ја испита целата целата постапка од самиот почеток па досега и ќе донесеме заклучоци после таа ревизија“, рече министерот Зоран Љутков.
Универзална сала изгоре на 9-ти април, само еден месец откако по пауза од две години продолжија градежните работи за реконструкција. Пожарот се случи само две недели откако беше поставена новата купола. Реконструкцијата ја започна поранешниот градоначалник Петре Шилегов, но сегашната градоначалничка на Скопје, Данела Арсовска не ја продолжи. Во февруари годинава, реконструкцијата на салата од Градот Скопје ја презема Министерството за култура.
Според фирмата изведувач, причините за избивањето на пожарот била стара инсталација, но не ја исклучија можноста и да е човечки фактор.
Екс Министерката за култура Бисера Костадиновска-Стојчевска рече дека ќе се продолжи со градбата штом се утврдат причините за пожарот. Но до крајот на нејзиниот мандат такво нешто не се случи.
