Министерот за внатрешни работи Панче Тошковски гарантира фер и демокртски избори. Тој во интервју за Радио Слободна Европа вели дека преку механизмите кои ги има на располагање МВР, тој ќе направи се што е во негова моќ, двојните избори да се спроведат во најдобар ред. Тошковски се сомнева во потегот на власта која на само неколку денови пред тој да застане на чело на МВР, постави нов началник на СВР Тетово, а нему, не му беше дозволено да го смени. Техничкиот министер во МВР, откри дека добил гаранција од тетовскиот началник дека ќе има мирни избори, но превентивно, најави засилено полициско обезбедување во Тетово и Гостивар за време на двојните избори.
“Моите механизми се, во рамки на одредбите од законот кои се насочени кон овозможување на соодветни предуслови, да сториме се што можеме за да имаме фер и демократски избори. Максимално да го засилиме тој дел таму со полициски службеници, да побараме поддршка од нашите меѓународни партнери, ОБСЕ ОДИХР изразија огромна загриженост за овој факт, тој дел ќе биде засилено покриен и со набљудувачи од нивна страна” – вели министерот Тошковски.
Тошковски категорично ги одби обвинувањата за руско влијание во неговата партија. Константните обвинувања од СДСМ и ДУИ дека ВМРО-ДПМНЕ е против Европа тој ги нарече „несериозни“.
“Сега ќе говорам во однос на ВМРО ДПМНЕ, тотално е несериозно и е крајно политиканство како и политичка злоупотреба ВМРО ДПМНЕ да биде обвинувана во оваа насока. Знаеме дека ВМРО ДПМНЕ е првата партија која прецизно и јасно има дефинирано во својот статут каде се гледа себе си и каде ја гледа државата а тоа е се разбира како дел од европското семејство и дел од НАТО и никако поинаку” изјави Тошковски.
Политичките подметнувања за некакво руско влијание во ВМРО-ДПМНЕ, Тошковски ги оценува како предизборен бид за манипулација на граѓаните, со оглед на рејтингот кој што го имаат сe уште владеачките партии СДСМ и ДУИ.
