Нема поевтинување на парното за домаќинствата. И покрај тоа што падна цената на гасот, според Бислимоски нема простор за пониски сметки. Помалку ќе плаќаат само училиштата, градинките, малите дуќани, компании, јавни институции и банки. Ова е според последната одлука на Регулаторната комисија.
„Регулаторната комисија за енергетика донесе одлука со која што цената на топлинската енергија за потрошувачите во градот Скопје, пред се за деловните корисници, основните училишта, јавните институции, градинките малите дуќанчиња, ја намаливме за 35%. Значи нема толкав простор. Доколку би оделе кај домаќинствата би требало да влеземе во субвенциите. Субвенциите се веќе обезбедени, префрлени се на сметката на ЕСМ, и сите сметки до крајот на грејната сезона ќе ги субвенционира“, рече Бислимоски.
Бислимоски вели дека одлуката ја донеле заради намалените трошоци на природниот гас и дека цената кај потрошувачите е иста затоа што таа е за 75% пониска од онаа на деловните корисници.
Ако се задржат сегашните цени на гасот, на редовното објавување нови ценовници во јули може да се очекува поевтинување и за домаќинствата, вели Бислимоски.
„Ќе ја следиме ситуацијата и вообичаено во текот на јули како што правиме досега ќе донесеме нови одлуки за цената на топлинска енергија на домаќинствата“, рече Бислимоски
Бислимоски објасни дека во изминатите три години само домаќинствата добивале субвенции, додека деловните корисници самите го сноселе товарот од енергетската криза и дека сега е моментот да им се помогне.
Љубиша Владимиров
