Здравствените работници се плашат дека повторно ќе бидат изиграни од власта. Оние кои досега во здравството работеле со години со договор на дело,сега може да извисат. Се сомневаат дека со најавените 1.117 вработувања ќе се примат и здравствени работници без ниту еден ден искуство, туку благодарение на родниски врски, врски со власта или партиска книшка.
Трајните вработувања во здравството пред Нова година ги најави министерот Меџити, но досега, во ниту една здравствена установа нема објавено конкурс. Но со оглед на та што наскро почнуваат да течат роковите за избори, се очекува пред формирањето на Техниката влада да бидат распишани огласи на кој ќе може да се пријави било кој.
Министерот Меџити не прецизира рокови, но и не гарантира ништо, туку е свесен дека ќе има пропусти, уверува дека менаџерите ќе го направат вистинскиот избор кој ќе добие трајно вработување.
“Вработувањата во здравството ќе одат според заслуги, секој може да конкурира на огласите, а доколку не е задоволен од процесот може да се жали на комисија” изјави денеска министерот за здравство.
Од министертвото информираат дека постапката за прибирање податоци од здравствените установи за тоа колку вработени има под договор на дело и каков кадар недостасува е почната пред Нова година, а околу 30 проценти од здравствените установи ги комплетирале бараните документи и истите биле процесуирани до Фондот за здравство. Следна институција е министерството за финансии кое треба да обезбеди средства за вработување. Дури потоа се распишуваат огласи, и се бодуваат кандидатите.
