Секој што има каква било информација за 14-годишната Вања, да пријави на 112.
Повеќе од 48 часа се трага по исчезнатата 14-годишна Вања од Скопје. Алармот преку социјалните мрежи се вклучи и во соседството.
На улиците по кои се движела Вања кон училиштето во понеделникот утрото, се залепени фотографии со надеж дека некој ќе помогне во нејзиното пронаоѓање. Последните информации се дека последниот сигнал од телефонот марка Ајфон кој го носела со себе, е лоциран на булеварот Партизански Одреди, спроти Универзалната Сала, во регионот на Дебар Маало.
Полицијата продолжува да го бара девојчето, а во потрагата се вклучи и Ловечката Федерација на Македонија.
Вознемиреноста е на највисоко ниво со оглед на тоа дека Вања исчезна на прометни улици во период кога голем број луѓе одат на работа и деца на училиште.
А родителите токму од овој дел на градот, подолго време алармираат за инциденти кои ја загрозуваат безбедноста на нивните деца. Општина Центар барала од нив да потпишат петиција за која од надлежните инсититуции ќе бараат механизми за намалување на меѓуврсничкото насилство и девијантно однесување.
Од МВР добиле и уверување, тврдеше тогаш градоначалникот на Центар, дека до декември поголем број полициски службеници ќе партролираат во кругот на Дебар Маало поради наводите дека добро организирана банда на малолетници напаѓа, малтретира и ограбува деца.
– Бараме измена на одредени членови во законите. Самата петиција, се собираат потписи и ќе биде доставена до сите медиуми. Ако сте прошетале деновиве низ Дебар маало и низ општината, може да забележите зголемено присуство на полицијата кои се на улиците. Целта ни е онаа малолетна деликвенција и оние немили настани да ги искорениме – рече Герасимовски на прес-конференција каде се промовираа „Маалските игри“.
Родителите од централното подрачје на градот, на средба, донеле повеќе заклучоци кои биле испратени до надлежните институции, бидејќи според нивните кажувања, група делувала така што таргетира некој што во моментот е сам или помало друштво, заплашува и го напаѓа оној што нема да успее да им побегне. Доаѓаат организирано со повозрасни лица кои ги оставаат да хараат низ Дебар Маало, кај Градежен, во Градски парк и кафулињата и сендвичарите каде најчесто се собираат помлади, велат родителите. Често во себе носеле и ладно оружје.
Една од клучните точки за кои реагирале родителите на средбата е „да не се дозволи да стигне до степен кога децата кои живеат таму веќе да не можат слободно да излегуваат на своите улици, да играат и да се дружат..“
Секој што има каква било информација за 14-годишната Вања, да пријави на 112.
