Не очекува ли изборна кампања без митинзи? Ќе се откажат ли партиите од традиционалните собири и ќе се сведат само на прес конференции и социјални медиуми, или ќе смислат нешто по-оригинално?
Денешната одлука на владата со која препорачува откажување на сите јавни собири до 6 марти поради стравот од Корона вирусот, отвора низа прашања, како на пример дали тоа се однесува и на партиските митинзи и дали е можно таа мерка да се продолжи и остане на сила до април.
Доколку е така, партиите ќе мора да се откажат од митинзи, протести или пак од масовни средби со граѓани во пресрет на предизборната кампања.
Од државната изборна комисија велат, се надеваат дека политичките партии ќе ги почитуваат препораките на владата.
„Се надевам ќе ги почитуваат одлуките на Владата. Ситуацијата е таква во која мора сите да внимаваме и да се однесуваме одговорно. Се надевам дека ќе се однесуваат одговорно во целата ситуација“, рече Дерковски одговорајќи на новинарско прашање по денешната јавна седница на ДИК.
Од СДСМ засега немаат никаква реакција за ова прашање, додека пак ДУИ донесе одлука за одложување на неопределен рок на поголемите предвидени собири со граѓаните. Ги повикуваат и останатите партии да го сторат тоа. ВМРО-ДПМНЕ ќе одлучува за постапките во периодот кој следи. Мицкоски смета дека единствено власта би имала корист ако собирите и протестите на опозицијата бидат одложени.
“Најсреќни би биле исплашените од СДСМ да го користат корона вирусот за ВМРО-ДПМНЕ да не го мобилизира народот и тие молеа Бога да се случи ова за тие да може ВМРО-ДПМНЕ да не излегува заедно со народот и да поротестира против она лицемерие. Чекорите на ВМРО-ДПМНЕ бчлаговремено ќе бидат презентирани”, изјави вчера лидерот на ВМРО-ДПМНЕ Мицкоски.
Предизборната кампања започнува на 23 март.
Мери Ѓорѓиевска
